21.10.2022

Достар, Қорымыздың 2019 жыл білімгері, Исмаилов Кенжебек @ismailov_kenzhe биыл жазда Work&Travel бағдарламасы бойынша Америкаға сапары жайында ой бөліспек.

«Сәлем, Әлем! Менің есімім – Кенжебек. Мен маркетинг мамандығында, төртінші курста оқимын. Биыл жазда Work&Travel бағдарламасымен АҚШ-та төрт ай бойы болып қайтым. Алматыдан Америкаға жиырма сағаттық жолға қалай шыдағанымды өзім де білмеймін. Кеден офицері төлқұжатымды ұзақ тексеріске салды, ақыры сәттілік тілеп, қармауынан босатты-ау. Сарыағаштың тумасы, міне, мендей қарапайым қазақ баласы мұхит асып, әлемнің ең алып шаһарларының бірі New York City қаласына жеткеніне сенер-сенбестен, JFK әуежайынан шықтым. Көзге сары такси ілікті, дәл сол мезетте Америкаға жеткенімді тұла бойым сезді.

Көкті керген асқар таудай зәулім үйлер, үлкен парктер, барлығын санаңа сыйдыра алмай, қайран қаласың. Нью-Йорк үнемі қозғалыста, 20 миллионнан астам адамның мекеніне айналған бұл қала, ойлап қарасаң, бүкіл Қазақстан халқын қойнына сыйдырып тұр. Нью-Йоркте неғұрлым көп жүрген сайын, соғұрлым қарама-қайшы сезімде боласың. Зеңгір қалада адам баласы құмның бір қиыршығы екен, алайда бұл аласапыран – шексіз мүмкіндік бұлағы, оны айқын сезінесің.

АҚШ-та Нью-Йорктан басқа, Вашингтон, Лос-Анджелес, Лас-Вегас, Сан-Франциско секілді қалаларда болып, саяхаттадым. Бәрінен де ұнағаны – көптеген IT компаниялардың штаб-пәтерлері орналасқан Сан-Франциско. Сапар алдында алдыма қойған басты мақсаттың бірі – Кремний Алқабына барып қайту еді, сол үшін Google, Youtube, Facebook, Airbnb, SalesForse компанияларында біраз уақыт өткіздім. Еркіндікті қалайтын кәсіпкерлердің білім ордасы, Stanford Университеті – инновация бесігі десе, артық емес. Оның дәлелі ретінде айтарым – оның түлектері Google, HP, Nike, Netflix секілді ел аузында жүрген көшбасшы компаниялардың негізін қалаған.

Бұл сапар мені жеке шешім қабылдауға, стрессті жағдайлардан шығуға үйретіп, коммуникативті дағдыларымды дамытуға көмектесті. Мен кез-келген студент Work&Travel-ге қатысуға міндетті деп санаймын. Барлығы Сіз ойлағаннан да оңай, тек қана бастау қажет. Армандарыңызға жетуден ешқашан бас тартпаңыз! Осы жолда барлықтарыңызға сәттілік тілеймін!»